Nxënësit e një shkolle në Pejë sëmuren në ekskursion, prindërit kërkojnë llogari

Mbi 50 nxënës të shkollës fillore “Haxhi Zeka” në Zahaq të Pejës, janë sëmurë gjatë ekskursionit njëditorë që ishte organizuar nga Drejtoria e shkollës. Këtë e thonë prindërit të cilët kërkojnë llogari nga Këshilli Drejtues i shkollës. Por alivanosja e disa fëmijëve është konfirmuar edhe nga drejtori i shkollës. Ky i fundit ka kërkuar llogari nga mësimdhënësit.

Dy dite më parë, nxënësit e klasave të 2-ta të shkollës fillore “Haxhi Zeka” në Zahaq të Pejës udhëtuan në një ekskursion njëditor.

Por kjo shëtitje nuk shkoi siç u planifikua. Disa prej nxënësve u sëmurën në ekskursionin që u organizua nga drejtoria e shkollës në bashkëpunim me Këshillin e Prindërve.

Prindi Xhevdet Kelmendi, ka thënë se fëmija i tij për shkak të moskujdesit dhe nga temperaturat e larta është alivanosur në autobus.

“Mësuesit nuk kanë pranuar të bisedojnë me ne prindërit. Nxënësit na kanë treguar gjithçka. Në pjesën e lartë të autobusit kanë qenë 35-40 fëmijë. Ka qenë shumë i ngarkuar autobusi. Kanë kërkuar ndihmë. Ndihma nuk u është ofruar”, shprehet për RTV Dukagjinin Xhevdet Kelmendi.

Te njëjtin mendim e ka edhe Liridon Kastrati. Ky i fundit, tha se gjatë shëtitjes njëditore fëmijëve nuk u është siguruar udhëtimi siç duhet. Sipas tij, janë alivanosur mbi 50 nxënës.

“Flasë në bazë të dëshmive të djalit tim dhe fëmijëve tjerë. Kanë kërkuar që në katin e dytë të ketë klimë. Kanë treguar që nuk janë mirë me shëndet dhe kanë kërkuar ujë, por as ujë nuk u është dhënë. Kur kanë zbritur poshtë u kanë thënë ngjituni lartë se mirë jeni”, thotë prindi Liridon Kastrati, përcjell Telegrafi.

Se nuk ka shkuar udhëtimi siç ishte planifikuar e pranon edhe drejtori i shkollës “Haxhi Zeka” në Zahaq, Sami Zekaj. Ai thotë se ka kërkuar llogari nga mësimdhënësit të cilët kanë qenë në këtë udhëtim.

“Për shkak se një numër i arsimtarëve kanë qenë si zëvendësues, ndoshta nuk e kanë kuptuar përgjegjësinë ndaj nxënësve që është dashur të kenë ata”, thotë Sami Zekaj.

Përndryshe, prindërit kanë thënë se me këtë organizim, Këshilli Drejtues i shkollës ka  shkelur Udhëzimin Administrativ. Sipas të njëjtit udhëzim, prindërit thonë se ndaj nxënësve të këtij niveli shkollor, duhet të ketë kujdes më të shtuar. /Telegrafi/