Evropianët dakord për bashkëpunim me BM kundër trafikimit të emigrantëve në La Mansh

evropianet-dakord-per-bashkepunim-me-bm-kunder-trafikimit-te-emigranteve-ne-la-mansh

Katër ditë pas fundosjes vdekjeprurëse në La Mansh, pjesëmarrësit evropianë në një takim urgjent ranë dakord të përmirësojnë bashkëpunimin me Britaninë e Madhe, pavarësisht mungesës së britanikëve, mes tensioneve të vazhdueshme midis Londrës dhe Parisit.

Takimi u zhvillua si reagim ndaj dramës më të keqe migratore që ka ndodhur në detin që ndan Francën nga BM, që u mori jetën të paktën 27 emigrantëve, të mërkurën.

“Këto vdekje janë shumë të shumta dhe nuk mund të pranojmë që të vdesin të tjerë”, deklaroi në hapjen e takimit ministri i Brendshëm francez, Gerald Darmanin.

Në takim morën pjesë ministrat ose zyrtarët përgjegjës për Emigracionin nga Gjermania, Holanda dhe Belgjika, eurokomisionerja për Punët e Brendshme dhe drejtorët e agjencive evropiane të policisë kriminale, Europol dhe të kufijve, Frontex.

Në një deklaratë të përbashkët, pjesëmarrësit “riafirmuan angazhimin e tyre për të bërë gjithçka që është e mundur për të luftuar në mënyrë më efikase kundër rrjeteve kriminale të kontrabandistëve” dhe pranuan nevojën “për të përmirësuar bashkëpunimin me Britaninë e Madhe”. /atsh

The post Evropianët dakord për bashkëpunim me BM kundër trafikimit të emigrantëve në La Mansh appeared first on Mesazhi.com.